ARAŞDIRMA

Böyük İstanbul zəlzələsi nə zaman gözlənilir: Türkiyə fəlakətin astanasında

23-04-2025, 17:47

Ekologiya

AMP

Türkiyənin İstanbul şəhərində ard-arda 8 dəfə zəlzələ qeydə alınıb.

Ekologiya.az buldirir ki, bu barədə Fövqəladə Halların İdarə Olunması Agentliyi (AFAD) məlumat yayıb.Deyilib ki, ilk zəlzələ 3,9 bal gücündə olub və yerin 6,99 km dərinliyində baş verib.

İkinci zəlzələ isə 6,2 maqnitudalı olub və 10 saniyə davam edib. Növbəti zəlzələlər 4,4 və 4,9 bal gücündə qeydə alınıb və hər iki təkan yerin 7 kilometr dərinliyində baş verib.

Onlardan ən böyüyü 6,2 bal gücündə Silivri sahillərində olub. Sonuncu silkələnmə “CNN Türk”ün canlı efirində də əks olunub.

Türkiyənin daxili işlər naziri Ali Yerlikaya, AFAD və digər müvafiq qurumların hazırda dağıntı və xəsarət alanlarla bağlı ərazilərdə araşdırmalara başladığını açıqlayıb.

Eyni zamanda AFAD vətəndaşları uçma təhlükəsi olan tikililərə yaxın durmamağa çağırıb. İstanbul Valiliyi isə zəlzələ nəticəsində hələlik hər hansı dağıntı barədə məlumat daxil olmadığını bildirib.

Vətəndaşlar operator sıxlığı səbəbindən yaxınları ilə əlaqə saxlaya bilmirlər.

Prezident Rəcəb Tayyib Ərdoğan İstanbuldakı zəlzələlərlə bağlı məlumat almaq üçün daxili işlər naziri Əli Yerlikaya, ətraf mühit, şəhərsalma və iqlim dəyişikliyi naziri Murat Kurum və səhiyyə naziri Kamal Memişoğluna zəng edib. Prezidentin hadisələri izlədiyi bildirilib.

Ekologiya.az xəbər verir ki, İstanbulda zəlzələ ilə bağlı proqnozlar vaxtaşırı səslənir. Bundan əvvəl də İstanbulda dağıdıcı zəlzələlər barədə bir neçə tanınmış alim açıqlama vermişdi. Türkiyəli tanınmış geoloq və seysmoloq Celal Şengör Türkiyədə baş verə biləcək zəlzələlərlə bağlı ciddi xəbərdarlıq edib. Onun proqnozları xüsusilə İstanbul və ətraf bölgələr üçün narahatedici ssenarilər ortaya qoyur. Şengör bu günkü zəlzələləri şərh edərkən deyib ki, bu, İstanbulda gözlənilən böyük zəlzələnin xəbərçisi ola bilər:

“6,2 bal gücündə bir zəlzələnin ardından ondan zəif təkanların olması gözlənilən bir haldır. Lakin bundan sonra 6,2-dən daha güclü bir zəlzələ və ya zəlzələlər baş verərsə, bu, İstanbulda gözlənilən böyük zəlzələnin öncüsü ola biləcəyi ehtimalını daha da gücləndirir,” – deyə o bildirib.

Onun fikrincə, İstanbul yaxınlığında, xüsusilə Mərmərə dənizində ən azı 7 bal gücündə zəlzələ gözlənilir. O, bu zəlzələnin Yeşilköy və Tuzla kimi bölgələrdə 9 bal gücündə hiss ediləcəyini bildirib. Şengör bu zəlzələnin təxminən 2 dəqiqə davam edəcəyini və nəticələrinin çox ağır olacağını vurğulayıb. Onun sözlərinə görə, belə bir zəlzələ nəticəsində 60-70 min bina tamamilə dağılmasa da, ciddi zərər görəcək və xilasetmə tədbirləri üçün küçələrə giriş çətinləşəcək:

“Zəlzələdən sonra ən böyük fəlakət yanğınlar, talanlar və infrastruktur problemləri olacaq. Zəlzələdən sağ çıxanlar yaşadıqları dəhşətli vəziyyətlərə görə "kaş öləydik" deyəcəklər”. O həmçinin vurğulayıb ki, Mərmərədəki zəlzələ zamanı yer sürüşməsi baş verərsə, böyük sunami riski yaranacaq.

Professor Naci Görür isə bildirib ki, bu zəlzələ növbəti yeraltı təkanlardan xəbər verir:

“Zəlzələ baş verdi, bitdi, keçdi – deyiləcək bir şey yoxdur. Türkiyə heç vaxt dəyişməməli olan gündəmini bir daha xatırladı. Bu, böyük bir zəlzələnin gələcəyindən xəbər verir. İstanbulla bağlı səlahiyyətlilərə bir daha xəbərdarlıq edirəm. İtirəcək vaxtımız yoxdur.

İstanbulda, Mərmərə dənizində, Kumburqaz qırağında çoxlu zəlzələlər olur. Onlar müxtəlif maqnitudalardadır. Lakin hələ Mərmərədə gözlədiyimiz böyük zəlzələlər deyillər. Zəlzələ olmayanda danışmaq, tədbir görmək lazımdır. Əvvəlcə hökumət, sonra bələdiyyə və xalq əl-ələ verib şəhəri zəlzələyə hazırlamalıdır”.

Musavat.com

Tam mətni oxu →