XƏBƏRLƏR

Aİ-95 benzin istifadə edənlərə mühüm XƏBƏR!

11-03-2026, 15:26

Ekologiya

AMP

Son dövrlərdə Hörmüz boğazı ətrafında mümkün gərginlik və İran-ABŞ münasibətlərindəki qarşıdurma dünya enerji bazarlarının diqqət mərkəzindədir. Bu bölgə qlobal neft və yanacaq daşımalarının ən strateji marşrutlarından biri hesab olunur. Buna görə də burada baş verən hər hansı siyasi və ya hərbi gərginlik beynəlxalq bazarlarda neft və yanacaq qiymətlərinə təsir göstərə bilər. Belə bir şəraitdə isə sual yaranır: bu proseslər Azərbaycanda benzin qiymətlərinə necə təsir edə bilər?

Xüsusilə də Aİ-95 benzini ölkədə nə dərəcədə yerli istehsal olunur və ya biz bu yanacaq növündə idxaldan asılıyıq?

Ekologiya.az xəbər verir ki, bu barədə iqtisadçı Natiq Cəfərli Demokrat.az-a açıqlama verib və bildirib ki, Aİ-95 benzininin böyük hissəsi ölkəmizə idxal edilir:

“Əsasən Rumıniya, Qazaxıstan, Türkmənistan və Rusiyadan alınır. Qiymətlərin artacağını isə çox düşünmürəm. Çünki hazırda da bizdə kifayət qədər baha satılır. 1 manat 60 qəpik elə də ucuz qiymət deyil. Ən azından qonşu ölkələrlə müqayisədə (Türkmənistan, Qazaxıstan və Rusiya) ucuz sayılmır. Buna görə də qiymətin artacağını gözləmirəm. Təbii ki, bu, həm də münaqişənin nə qədər davam etməsindən asılıdır. Əgər yaxın vaxtda yekunlaşsa, təsiri də çox böyük olmayacaq”.

Qeyd edək ki, fevralın 28-dən etibarən ABŞ və İsrailin İrana hücumları bölgədə vəziyyəti kəskinləşdirib. İran tərəfi bu hücumlara İsrailə raketlər atmaqla cavab verib. Hadisələrin gedişində İranın dövlət televiziyası ali dini lider Ayətullah Xameneinin öz ofisində öldürüldüyü barədə məlumat yayıb. Bu xəbərlə əlaqədar ölkədə 40 günlük matəm və 7 günlük qeyri-iş günü elan edilib.

Gərginlik Azərbaycan sərhədlərinə də sıçrayıb. Martın 5-də günorta saatlarında İran ərazisindən Naxçıvan Muxtar Respublikasına dron hücumları təşkil edilib. Hücum zamanı "Arash-2" tipli pilotsuz uçuş aparatlarından istifadə olunduğu bildirilir. PUA-lardan biri Naxçıvan Hava Limanının terminal binasına, digəri isə Şəkərabad kəndində məktəbin yaxınlığına düşüb.

Hava limanına düşən dron binaya ciddi zərər vurmaqla yanaşı iki mülki şəxsin xəsarət almasına səbəb olub. Hadisə yerində araşdırmalar aparılır və təhlükəsizlik tədbirləri gücləndirilib. Bölgədəki hərbi aktivlik və siyasi qeyri-müəyyənlik davam edir.

Tam mətni oxu →