Bakı-İsmayıllı-Qəbələ magistral yolunun Şamaxı rayonunun Muğanlı kəndi ərazisindən keçən hissəsində yol-nəqliyyat hadisəsi baş verib.
Ekologiya.az-ın xəbərinə görə, hadisə zamanı dövlət qeydiyyat nişanı 90-KS-844 olan "Isuzu" markalı su daşıyan yük avtomobili naməlum səbəbdən idarəetmədən çıxaraq qəzaya uğrayıb. İlkin məlumata görə, avtomobil su yükü daşıyırmış. Qəza nəticəsində xoşbəxtlikdən ölən olmayıb. Yük avtomobilinin sürücüsü müxtəlif dərəcəli yüngül bədən xəsarətləri alıb. Ona hadisə yerində ilkin yardım göstərildiyi bildirilir.
Məlumat daxil olan kimi hadisə yerinə Dövlət Yol Polisi əməkdaşları cəlb edilib. Polis əməkdaşları ərazidə təhlükəsizlik tədbirləri görüb, nəqliyyatın hərəkətinin tənzimlənməsini təmin ediblər. Hazırda qəzanın başvermə səbəblərinin müəyyənləşdirilməsi istiqamətində araşdırma aparılır.
İlkin araşdırmanın nəticələrindən sonra hadisənin hansı şəraitdə baş verdiyi və qəzaya səbəb olan amillərlə bağlı əlavə məlumat veriləcəyi gözlənilir.
Qeyd edək ki, hadisə yerindən görüntülər Ekologiya.az-ın əməkdaşları tərəfindən lentə alınıb. Hazırda qəza yerində aidiyyəti qurumların əməkdaşları fəaliyyətini davam etdirirlər.
