• Ünvan : Nəsimi rayonu Ali Mustafayev 30/40. "City Mall" 3 cü mərtəbə
  • Əlaqə : (+99455) 270 92 95
  • TR
  • Sülhməramlıların Qarabağdan çıxarılması Azərbaycanın Liderinin zərgər dəqiqliyi ilə tətbiq etdiyi diplomatiyanın məntiqi yekunudur - ŞƏRH

    18

    apr

    Sülhməramlıların Qarabağdan çıxarılması Azərbaycanın Liderinin zərgər dəqiqliyi ilə tətbiq etdiyi diplomatiyanın məntiqi yekunudur - ŞƏRH

    Prezident İlham Əliyev tarixi missiya həyata keçirdiyinə, xalqımızın alnından məğlub ləkəsini sildiyinə, hər bir əsgər və zabitimizin arxasında durduğuna, şəhidimizin qisasını aldığına görə xalqımız onu Müzəffər Ali Baş Komandan adlandırdı.


    Təkcə şanlı Ordumuzun deyil, diplomatiyanın da mahir bilicisi olan bu müzəffər insan Azərbaycanın, sadəcə, regional səviyyədə gücünü artırmadı, həm də qlobalist strategiyasını möhkəmləndirməyə müvəffəq oldu. Azərbaycanın bugünkü durumu dövlətin inkişafın strateji koordinatoru kimi yenilənmiş konsepsiyasının nəticəsidir. Bu gün tam haqla və bir o qədər də qürurla deyə bilirik ki, Prezident İlham Əliyevin rəhbərliyi ilə ölkəmiz inkişaf üçün başlıca şərtlərdən biri olan müstəqil dövlət siyasətini genişləndirib və şaxələndirib. Dövlətimizin başçısının “Nəyi, necə, nə vaxt etmək lazımdır, bunu mən bilirəm” fikri bu dəfə də, sadəcə, sözdə qalmadı, məhz əməldə də, bu məqamda və amildə də sübut olundu.


    Bu fikirləri AZƏRTAC-a açıqlamasında politoloq Şəbnəm Həsənova səsləndirib.

    Tərəqqinin ölkənin daxili siyasətindən və beynəlxalq sistemdəki mövqeyindən də asılı olduğunu vurğulayan politoloq deyib ki, dəyişən inkişafda milli maraqlarımız heç zaman qlobal çoxtərəfliliyə qurban verilmədi. Tam əksinə, bütün amillər milli maraqların təmin olunmasına xidmət etdi, bütün hallarda məhz milli maraqlarımız əsas tutuldu. Vətən müharibəsində dünyadakı bütün azərbaycanlılar bir hədəfə fokuslandılar ki, bu da işğal altındakı torpaqlarımızın azad edilməsi idi. O vaxtadək keçilən yol isə dövlətimizin başçısının gərgin əməyinin nəticəsi idi. 2023-cü ilin antiterror tədbirləri isə bir daha sübut etdi ki, qurulan bütün planlara, cəhd edilən gizli sövdələşmələrə rəğmən, dövlətimizin atdığı hər bir addım diqqətlə ölçülüb-biçilmiş tədbirlərlə müşayiət olunur, hər şey düşünülmüş strategiya və vahid plan üzrə gedir. Bu planları deşifrə etməzdən əvvəl daha vacib amili vurğulayaq ki, Azərbaycan xalqının maraqlarını rəhbər tutan dövlətimizin başçısı şəhid qanı ilə qazanılan haqlı Zəfərimizi elə haqlı olaraq yüksək dəyərləndirir, Qələbəmizin yarımçıq olduğunu bəyan edir, yenə də dayaq nöqtəsinin xalq olduğunu bildirirdi. Məhz buna əsaslanan Müzəffər Ali Baş Komandan üçrəngli Bayrağımızı Xocalıda dalğalandırarkən bir daha xalq ona minnətdar oldu. Bu məqamda həm də mütləq vurğulanmalıdır ki, üçtərəfli Bəyanatda sülhməramlıların 2025-ci ilədək müvəqqəti olaraq Qarabağda yerləşdirilməsi bəndinin salınması təşəbbüsünü də məhz Prezident İlham Əliyev irəli sürmüş, “müvəqqəti” şərti qoymuşdu. Sülhməramlıların Azərbaycan ərazilərindən artıq çıxarılmağa başlanılması şübhəsiz ki, Azərbaycanın Liderinin zərgər dəqiqliyi ilə tətbiq etdiyi diplomatiyanın məntiqi yekunudur. Bu proses Azərbaycanın Şimal qonşusu olan Rusiya ilə normal münasibətlərinin və iki ölkənin ali rəhbərliyinin qərarının nəticəsidir.

    “Sülhməramlıların çıxarılmasına yenidən fərqli don geyindirməyə, bulanıq çalarlar qatmağa çalışırlar. Azərbaycanla Rusiya arasında münasibətlər bundan əvvəl də müsbət idi, bu amil də münasibətləri zəiflətməyəcək, əksinə, möhkəmləndirəcək. Tək və səlis məntiq odur ki, Qarabağın ağrılı səhifəsini Azərbaycan artıq çevirib, ikitərəfli münasibətlərdə hərbi və sülhməramlı komponent mövcud deyil, ölkəmizin gündəliyində isə azad olunmuş əraziləri dirçəltmək dayanır. Münaqişə yoxdursa, qoşun saxlamağın anlamı da yoxdur və Rusiya tərəfi də bunu anladı. Düşünürəm ki, münasibətlərdən hərbi komponent amilinin çıxarılması əməkdaşlıqda yeni üfüqlər açacaq, Üstəlik o faktı da nəzərə alaq ki, Rusiya və Azərbaycan ali rəhbərliyi arasında mövcud olan şəxsi münasibətlər iki qonşu ölkənin əlaqələrini gücləndirən əsas amildir”, - deyə Ş.Həsənova əlavə edib.


    Politoloq vurğulayıb ki, sülhməramlıların çıxarılmasına ABŞ-ın reaksiyası isə olduqca riyakardır. Bir daha sübut olunur ki, bunların ipinin üstünə odun yığmaq olmaz. Çünki “etibarlılıq” meyarını ölçmək üçün yenə də şans var idi ki, regiondan hərbi komponentin çıxarılmasını alqışlayasanız, Azərbaycanı təbrik edəsiniz və iki ölkə arasında sərt güc kənar saxlanılmaqla sülhə töhfə verməyin vacibliyi üzərində dayanasınız. Lakin sözdə deyil, əməldə. Rusiyanı Dnestryanı, Abxaziya, Cənubi Osetiya olmaqla bütün regionlardan hər mənada sıxışdırmağa çalışan, hətta 2022-ci ilin yanvarında KTMT qüvvələrinin Qazaxıstandan çıxarılmasını təqdir edən ABŞ Qarabağdakı sülhməramlılara münasibətdə yenə də bizə qarşı eyni məna ilə, lakin fərqli yol tutdu. ABŞ və Fransa regiona sülh prizmasından deyil, öz maraqlarının təmin olunması prizmasından yanaşdıqları üçün münaqişənin həllinin ən böyük əleyhdarlarıdır. Erməni rəsmiləri hətta aprelin 5-dən əvvəl bir-bir, iki-iki Pentaqona üz tutanda, orada görüşlər keçirəndə artıq məlum idi ki, Ermənistan militarlaşdırılır, hətta Ukraynaya vəd edilən, verilməyən hərbi dəstək İrəvana münasibətdə genişləndirilir. İndi isə ABŞ Dövlət Departamenti hərbi dəstək nəzərdə tutulan, deşifrə olunmuş sənədi “dezinformasiya” adlandırır. Ortada olan sənəd aparılan real müzakirələrin, atılan addımların məhsulu olan təkzibolunmaz real gizli paktdır.

    Bəzi dairələrin Azərbaycanın xarici siyasətinin sistematik addımlarına xələl gətirməklə yanaşı, dövlətimizə, cəmiyyətimizə daxildən də zərbə vurmaq yolunu tutduqlarını bildirən Ş.Həsənova deyib ki, bu, mümkünsüzdür. Azərbaycan bunun mümkünsüz olduğunu dəfələrlə sübut edib. Vaxt var idi bəziləri Xocalının alınacağına rişxəndlə yanaşırdılar. Sülhməramlıların çıxması ilə bağlı qərar bir daha bəlli dairələrin arzularını gözündə qoydu, sərsəm “proqnozlar” və boş ritorikalarının həqiqətən də boş, eyni zamanda, arqumentlərinin də çürük olduğunu sübut etdi. Siyasi meydanda Prezident İlham Əliyevlə rəqabət aparmaq siyasi savad baxımından kasad, məhdud dünyagörüşünə malik, ən əsası, qərəzli yanaşmaya malik olanların işi deyil. Bir daha sübut olundu ki, Azərbaycan Prezidenti xalqının alternativsiz Lideridir. Dövlətimizin başçısı uğurlu siyasətini məzmun, forma və tətbiq olmaqla üç əsas istiqamət üzrə son dərəcə aydın realizə edir

    Tarix : 18-04-2024, 19:26 | Oxunub: 141