Narkotik şəbəkəsi ifşa edildi

Nərimanov rayonunda keçirilən əməliyyat zamanı 27 yaşlı Paşa Bayramov və onunla əlbir olan 46 yaşlı qadın saxlanılıb. Nərimanov Rayon Polis İdarəsinin əməkdaşları tərəfindən həyata keçirilən tədbir nəticəsində onların üzərindən və yaşadıqları ünvanlardan ümumilikdə 6 kiloqramdan artıq narkotik vasitə – marixuana və tiryək aşkarlanıb.

Araşdırmalar zamanı müəyyən edilib ki, saxlanılan şəxslər narkotikləri paytaxtın müxtəlif ünvanlarına yerləşdirərək satışını təşkil etməyi planlaşdırıblar. Faktla bağlı cinayət işi başlanılıb, məhkəmənin qərarı ilə hər iki şəxs barəsində həbs qətimkan tədbiri seçilib.

Ekologiya.az xəbər verir ki, bütün bu əməliyyatlar fonunda Daxili İşlər Nazirliyi tərəfindən yayılmış rəsmi məlumatda iyunun 6–7-də ölkə üzrə həyata keçirilən genişmiqyaslı tədbirlərin nəticələri açıqlanıb.

Məlumata görə, həmin günlərdə respublika ərazisində ümumilikdə 92 cinayətin üstü açılıb, əvvəlki dövrlərdən bağlı qalan daha 7 cinayət aydınlaşdırılıb. Axtarışda olan 77 nəfər, o cümlədən borclu şəxs qismində axtarılan 50 nəfər saxlanılaraq aidiyyəti üzrə təhvil verilib. Cinayət törətməkdə şübhəli bilinən 91 nəfərin tutulduğu bildirilir. Narkotiklərlə bağlı əməliyyatlar da geniş miqyas alıb. Ümumilikdə 32 fakt üzrə qanunsuz dövriyyə aşkarlanıb, 73 kiloqramdan artıq narkotik vasitə və 5688 ədəd güclü təsiredici metadon həbi götürülüb.

Bundan əlavə, yabanı halda bitən 7440 ədəd çətənə kolu aşkar edilərək məhv edilib. Silah-sursatla bağlı keçirilən tədbirlərdə isə 1 qumbara və 6 tüfəngin götürüldüyü qeyd olunur. Qanunsuz silah saxlama faktlarının qarşısının alınması istiqamətində əməliyyat və profilaktik tədbirlərin davam etdiyi vurğulanır. Eyni günlərdə keçirilən digər əməliyyat nəticəsində Qax rayonunda da böyük həcmli narkotik bitkilər məhv edilib. Qax rayonu ərazisində “Xaş-xaş-2026” şərti adlı kompleks tədbirlər çərçivəsində yabanı halda bitən 3300 ədəd çətənə kolu – ümumilikdə 1 ton 200 kiloqram narkotik tərkibli bitki aşkar edilərək məhv olunub.

Hadisələrin ümumi mənzərəsi göstərir ki, ölkə üzrə narkotik vasitələrin qanunsuz dövriyyəsinə, eləcə də cinayətkarlığın müxtəlif növlərinə qarşı əməliyyatlar intensiv şəkildə davam etdirilir.