Qazlaşdırılmayan kəndlərin əhalisinin, həmçinin Müdafiə Nazirliyinin, Dövlət Sərhəd Xidmətinin hərbi hissələrinin, təhsil, səhiyyə müəssisələrinin oduna olan tələbatını ödəmək məqsədilə hazırda ölkə üzrə meşə ərazilərinin xüsusi ayrılmış sahələrində oduncaq tədarükü işləri aparılır və təkcə ötən həftə ərzində 3901 m³ oduncaq tədarük olunub.

Ekologiya və Təbii Sərvətlər Nazirliyinin mətbuat katibi İradə İbrahimova Ekologiya.az-a bildirib ki, aparılan mövsümi tədarük prosesi təəssüf ki, nədənsə ayrı-ayrı şəxslər tərəfindən meşə sahələrində ağacların qanunsuz kəsilməsi kimi təqdim edilir və nəticədə cəmiyyətdə çaşqınlıq yaranır.

"Xahiş edirəm, hər il bu mövsümdə qışa hazırlıq üçün meşələrdə oduncaq tədarük olunduğunu anlayışla qarşılayasınız və bunu qanunsuz ağac kəsintisi kimi qələmə verib qeyri-obyektiv rəy yaratmayasınız. Xüsusi olaraq vurğulayıram ki, hər il bu mövsümdə qazlaşdırılmayan kəndlərin əhalisinin, hərbi hissələrin, təhsil, səhiyyə müəssisələrinin oduncağa olan tələbatı yerinə yetirilir”.

Mətbuat katibinin sözlərinə görə, tədarükə başlamamışdan əvvəl şəffaflığın təmin olunması, ictimai nəzarətin həyata keçirilməsi məqsədilə respublikanın bütün rayonlarında may ayından etibarən QHT nümayəndələrinin, rayon sakinlərinin və ictimai fəalların iştirakı ilə ictimai dinləmələr keçirilir, oduncağın tədarük ediləcəyi meşə əraziləri barədə Nazirliyin rəsmi sosial şəbəkə hesablarında əvvəlcədən ictimaiyyətə məlumat verilir.

Nazirliyin sözçüsü ötən həftə ərzində ayrı-ayrı bölgələrdə tədarük olunan oduncağın həcmi barədə də məlumat verib:

"Cənub bölgəsində Lerik rayonu üzrə 45 m³, Astara rayonu üzrə 42 m³, şimal bölgəsində Quba rayonu üzrə 900 m³, Qusar rayonu üzrə 500 m³, Xaçmaz rayonu üzrə 294 m³, Şabran rayonu üzrə 55 m³ oduncaq tədarük edilib.

Eyni zamanda, Tovuz rayonu üzrə 19 m³, Göygöl rayonu üzrə 81 m³, Goranboy rayonu üzrə 90 m³, Gədəbəy rayonu üzrə 80 m³, Daşkəsən rayonu üzrə 80 m³, Samux rayonu üzrə 30 m³, Şəmkir rayonu üzrə 20 m³, Şəki rayonu üzrə 121 m³, Qax rayonu üzrə 200 m³, Zaqatala rayonu üzrə 400 m³, Balakən rayonu üzrə 276 m³, Qəbələ rayonu üzrə 250 m³, Oğuz rayonu üzrə 141 m³, İsmayıllı rayonu üzrə 202 m³, Ağsu rayonu üzrə 75 m³ oduncaq tədarük olunub”.