Azərbaycanda ölçmə vasitələrinin tipinin təsdiqi xidməti üzrə əməliyyatların sayı azalıb

Azərbaycanda ölçmə vasitələrinin tipinin təsdiqi xidmətinin işi axınında əməliyyat sayı 17-dən 13-ə enib.

"Report" xəbər verir ki, bunu İqtisadiyyat Nazirliyi yanında Antiinhisar və İstehlak Bazarlarına Nəzarət Dövlət Xidmətinin rəis müavini İlqar Həsənov bu gün keçirilən "Milli Metrologiya Forum"unda deyib.

O qeyd edib ki, hər bir ölkədə metrologiya sahəsinin inkişafı onun keyfiyyət infrastrukturunun ümumi inkişafına bağlıdır: "Keyfiyyət infrastrukturunun əsas pillələri var, bunlar standartlaşdırma və uyğunluğun qiymətləndirilməsidir".

İ. Həsənovun sözlərinə görə, Azərbaycan metrologiya sistemi öz yeni mərhələsinə qədəm qoyub: "Bu il ölkənin milli maraqlarına xidmət edən bir neçə etalon laboratoriyaların qurulmasına başlanıb".

O bildirib ki, 2024-cü ildən etibarən ölçmə vasitələrinin tipinin təsdiq edilməsini Antiinhisar və İstehlak Bazarlarına Nəzarət Dövlət Xidməti həyata keçirir.