İmişlidə ətraf mühitə zərər vuran sahibkar məsuliyyətə cəlb edilib

İmişlidə ətraf mühitə zərər vuran sahibkar məsuliyyətə cəlb edilib.

Ekologiya.az-ın xəbərinə görə, Daxili İşlər Nazirliyi ilə Ekologiya və Təbii Sərvətlər Nazirliyi birgə tədbir keçirib.

Rayon Polis Şöbəsinin və Ərazi üzrə Ekologiya və Təbii Sərvətlər Nazirliyinin əməkdaşlarının ətraf mühitin mühafizəsinin gücləndirilməsi və sanitariya-gigiyena qaydalarının pozulması hallarının qarşısının alınması istiqamətində keçirdikləri birgə tədbir zamanı rayonun Xoşçobanlı kəndi ərazisində yerləşən avtomobil təmiri məntəqələrinin birinin ətrafında təmir zamanı yaranan tullantıların qalaqlanması faktı aşkar edilib.

Aşkar edilmiş faktla bağlı qeyd olunan qayda pozuntusuna yol verən sahibkar barəsində İnzibati Xətalar Məcəlləsinin 271-ci (sənaye və məişət tullantılarının qalaqlanması və yandırılması zamanı ətraf mühitin mühafizəsi tələblərinə əməl edilməməsi) maddəsi ilə protokol tərtib olunub və həmin şəxs qanunvericiliyə uyğun olaraq məsuliyyətə cəlb olunub.
Bu istiqamətdə tədbirlər davam etdirilir.